15 February 2020

കന്യക

അമൃത പ്രീതം
അമൃത പ്രീതം

നിന്റെ കിടപ്പറയിലേക്കു വന്നുകയറിയപ്പോൾ
ഞാൻ ഒരാളല്ലായിരുന്നു, രണ്ടുപേരായിരുന്നു.
ഒരുവൾ വിവാഹിത. മറ്റവൾ
കളങ്കമേൽക്കാത്ത കന്യക.

നമ്മുടെ ഒന്നായിച്ചേരലിന് കന്യകയെ
ബലി നൽകേണ്ടിയിരുന്നു,—ഞാനവളെ കൊന്നു.
ചട്ടപ്രകാരം ഇത്തരം കൊലകൾ അനുവദനീയമാണ്,
ഇതോടൊപ്പമുണ്ടാകുന്ന അപമാനമാണ് ചട്ടവിരുദ്ധം.
അതിനാൽ അപമാനഭാരം ഞാൻ പേറി.

നേരം വെളുത്തപ്പോൾ, എന്റെ
കൈകളിൽ ഞാൻ രക്തം കണ്ടു,
ശരീരത്തിലെ മണങ്ങളെ കഴുകിക്കളയും
പോലെ ഞാനത് കഴുകി കളഞ്ഞു.

പക്ഷേ കണ്ണാടിയിൽ നോക്കിയപ്പോൾ
എനിക്കു മുന്നിൽ അതാ അവൾ നിൽക്കുന്നു;
കഴിഞ്ഞ രാത്രി ഞാൻ കൊന്നുകളഞ്ഞെന്ന്
കരുതിയ അതേ അവൾ തന്നെ.

ദൈവമേ! കിടപ്പറയിൽ അത്രയ്ക്കിരുട്ടായിരുന്നോ,
കൊല്ലേണ്ടിയിരുന്നവൾക്കു പകരം ഞാൻ
ഇല്ലാണ്ടാക്കിയത് മറ്റവളെ ആയിരുന്നോ?