16 February 2020

ആ രാത്രി

സി.പി കവാഫി
സി.പി കവാഫി 

വശക്കേടു പിടിച്ച മദ്യശാലയ്ക്കു മുകളിൽ
പഴകി വൃത്തികെട്ടു കിടന്ന മുറി.
ഇടുങ്ങിയതും വെടിപ്പില്ലാത്തതുമായ
ഊടുവഴിയിലേക്കായിരുന്നു
അതിന്റെ ജനൽ തുറന്നിരുന്നത്.

താഴെ നിന്നും ചീട്ടുകളിക്കാരും
കുടിയന്മാരുമായ തൊഴിലാളികളുടെ
ശബ്ദം കേൾക്കാമായിരുന്നു.

അവിടെ, മുഷിഞ്ഞ കിടക്കയിൽ
പ്രേമത്തിന്റെ ശരീരത്തെ ഞാൻ സ്വന്തമാക്കി,
ആ ചുണ്ടുകൾ— പനിനീർചുവപ്പാർന്ന
കാമാതുരമായ ചുണ്ടുകൾ
എന്നെ ലഹരിപിടിപ്പിച്ചു,
ഇപ്പോൾ പോലും ഇതെഴുതുമ്പോൾ,
വർഷങ്ങൾക്ക് ശേഷവും,
തനിച്ചു കഴിയുന്ന ഈ വീട്ടിൽ,
ഞാൻ അതിനാൽ ഉന്മത്തനാകുന്നു.

“One Night” from C. P. Cavafy: Collected Poems. Published by Alfred A. Knopf